اسلام آباد: وزیراعظم شہباز شریف نے کہا ہے کہ بلوچستان کے عوام کی فلاح و بہبود حکومت کی اولین ترجیح ہے۔
تفصیلات کے مطابق وزیراعظم محمد شہباز شریف سے صدر نیشنل پارٹی ڈاکٹر عبد المالک بلوچ کی قیادت میں وفد نے ملاقات کی۔ جس میں نائب وزیراعظم و وزیر خارجہ اسحاق ڈار، وفاقی وزیر قانون و انصاف اعظم نذیر تارڑ اور وزیر اعظم کے مشیر برائے سیاسی امور رانا ثناءاللہ بھی موجود تھے۔
وفد میں سینیٹر جان محمد اور رکن قومی اسمبلی پلن بلوچ شامل تھے۔
وزیراعظم ہاؤس کی جانب سے جاری اعلامیے کے مطابق ملاقات میں صوبہ بلوچستان کی سیاسی و مجموعی صورتحال پر تفصیلی تبادلہ خیال کیا گیا۔
شرکا سے گفتگو میں وزیراعظم نے کہا کہ بلوچستان کے عوام کی فلاح و بہبود حکومت کی اولین ترجیح ہے، صوبے کے نوجوانوں کو روزگار کے یکساں مواقع فراہم کرنے کے لئے اقدامات اٹھائے جا رہے ہیں۔
ڈاکٹر عبد المالک بلوچ نے بلوچستان کے زرعی ٹیوب ویلوں کی شمسی توانائی پر منتقلی کے اقدام پر وزیراعظم کا شکریہ ادا کیا اور کہا کہ زرعی ٹیوب ویلوں کی سولرآئزیشن کا بلوچستان کے کسانوں کا دیرینہ مطالبہ پورا ہو گیا، اس طرح کے اقدامات بلوچستان کی ترقی و خوشحالی کی جانب مثبت پیشرفت ہیں۔
