پاکستان کی وزیر مملکت برائے خزانہ عائشہ غوث پاشا نے کہا ہے کہ سعودی عرب نے آئی ایم ایف کو پاکستان کے لیے فنانسنگ کی یقین دہانی کروا دی ہے۔
عرب نیوز کے مطابق بیرونی فنانسنگ کی مد میں سعودی عرب کے دو ارب ڈالر فراہمی آئی ایم ایف کی ان کی شرائط میں سے ایک ہے جس کے تحت پاکستان کا فنڈ سے معاہدہ ہو سکتا ہے اور وہ ڈیفالٹ سے بچ سکتا ہے۔
جمعرات کو عائشہ غوث پاشا نے اسلام آباد میں میڈیا سے گفتگو کرتے ہوئے کہا کہ ’بظاہر سعودی عرب نے آئی ایم ایف کو یقین دہانی کروا دی ہے، اور آئی ایم ایف نے ہمیں عندیہ دیا ہے ان کا اس سلسلے میں ان (سعودی عرب) سے رابطہ ہوا ہے۔‘ تاہم پاکستان میں آئی ایم ایف کی نمائندہ نے اس حوالے سے فوری طور پر کوئی تبصرہ نہیں کیا۔
مزید پڑھیں
دنیا پاکستان کے معاشی اور سماجی استحکام کے لیے کردار ادا کرے: چین
ادائیگیوں کے توازن میں کمی پورا کرنے کے لیے پاکستان کو یقین دہانی کروانی ہو گی: آئی ایم ایف
آئی ایم ایف سے ممکنہ معاہدہ، ’سستا پیٹرول سکیم پر وضاحت دینا ہو گی‘
آئی ایم ایف نے پاکستان کو کہا ہے کہ وہ جون میں ختم ہونے والے مالی سال کے لیے ادائیگیوں کے توازن میں فرق کو پورا کرنے کے لیے دوست ممالک سے بیرونی فنانسنگ کی یقین دہانی لے۔
پاکستان رواں برس فروری سے آئی ایم ایف سے معاہدہ کر کے ایک ارب 10 کروڑ ڈالر حاصل کرنے کی کوشش کر رہا ہے۔
یہ فنڈز آئی ایم ایف کے اس بیل آؤٹ پیکچ کا حصہ ہیں جس کی منظوری 2019 میں دی گئی تھی۔
آئی ایم ایف کے ساتھ معاہدے سے پاکستان کے لیے دیگر چینلز سے فنانسنگ حاصل کرنے کے دروازے بھی کھلیں گے جس سے اس کے زرمبادلہ کے ذخائر میں اضافہ ہو گا۔
وزیر مملکت نے کہا کہ اس حوالے سے پاکستان کی متحدہ عرب امارات کے ساتھ بھی بات چیت ہو رہی ہے۔
